“Gömrük orqanlarının apardığı siyasət daxili bazarın yerli mallarla təmin olunmasını məhdudlaşdırır”.
Bu fikirləri Yenicag.az-a açıqlamasında bir sıra məhsulların, xüsusilə, mövsümi meyvələrin ucuzlaşmaq əvəzinə, getdikcə bahalaşmasının səbəblərini şərh edən sabiq millət vəkili Nazim Bəydəmirli deyib. Nazim Bəydəmirlinin sözlərinə görə, Kənd Təsərrüfatı Nazirliyinin timsalında dövlətin ümumi sahibkarlıqda rəqabət mühitini təmin edəcək addımları atmaması da mövcud bahalığın əsas səbəblərindən biridir:

“Azərbaycanda spesifik qiymət siyasəti var. Uzun müddətdir ki, bazarlarda qiymətlərin optimallaşmasını görmürük. Bunun da əsas səbəbi kənd təsərrüfatı məhsullarının bazara çıxışının çətin olması, iqtisadiyyatda inhisarçılığın mövcudluğu, Kənd Təsərrüfatı Nazirliyinin timsalında dövlətin ümumi sahibkarlıqda rəqabət mühitini formalaşdıran addımlar atmamasıdır. Müxtəlif yarmarkalar adı altında dövlət vəsaiti hesabına şəxsi biznes qurmaq cəhdləri də o səbəblərdən biridir. Azərbaycanda antiinhisar qanunvericiliyinə zidd olan ticarət şirkətləri qurulur. Özəl sektorun bu sahədə fəaliyyəti varsa, dövlət buna qarşı müvafiq qurumlar yarada bilməz. Bu, birbaşa qanunun tələbidir. Ona görə də, kənd təsərrüfatı siyasəti demək olar ki, iflasa uğrayıb”.

Ekspert mövcud bahalaşmada, o cümlədən, süni qiymət artımında gömrük orqanlarının “misilsiz” rol oynadıqlarını bildirib: “Qiymətlərin optimallaşması üçün dövlətin yaratdığı şirkətlər vasitəsilə bazara müdaxilə aradan qaldırılmalı və məmur sahibkarlığı birdəfəlik ləğv olunmalıdır. Gömrük orqanlarının apardığı siyasət də daxili bazarın yerli mallarla təmin olunmasının məhdudlaşmasına gətirib çıxarır. Sahibkarların aldıqları malların qiyməti dövlət rüsumu və ƏDV ilə hesablanmır. Qiymət artımlarını gömrük orqanları həyata keçirir. Qiymətləri öz ağıllarının məhsulu kimi müəyyənləşdirərək, bununla da guya dövlət büdcəsini artırmağa yönəlmiş süni PR kampaniyaya xidmət edirlər. Bütün bunlar isə nəticədə süni qiymət artımına gətirib çıxarır. Sadalanan səbəblər həm yerli, həm də mövsümi məhsulların bahalaşmasına zəmin yaradır”.