İstanbulda Azərbaycanın şanlı Qarabağ Zəfərinin ikinci ildönümü münasibətilə “Bir millət, iki dövlət” şüarı altında tədbir keçirilib.

Bayram tədbiri ölkəmizin İstanbuldakı Baş konsulluğu və İstanbulun Tuzla Bələdiyyəsinin birgə təşkilatçılığı ilə baş tutub.

Əvvəl iki qardaş ölkənin Dövlət himnləri səsləndirilib, şəhidlərin əziz xatirəsi bir dəqiqəlik sükutla yad edilib.

Tədbirdə çıxış edən Türkiyə Prezidenti Administrasiyasının Kommunikasiya İdarəsinin rəhbəri Fahrettin Altun, Azərbaycanın İstanbuldakı Baş konsulu Nərminə Mustafayeva, Tuzla Bələdiyyəsinin sədri Sadi Yazıcı Azərbaycanın qazandığı Qələbənin 30 illik həsrətə son qoyduğunu bildirib, böyük Zəfərin türk dünyası üçün müstəsna əhəmiyyətindən söz açıblar.

Türkiyə Prezidenti Administrasiyasının Kommunikasiya İdarəsinin rəhbəri Fahrettin Altun bildirib ki, 30 il erməni işğalı altında olan torpaqların Azərbaycan Ordusu tərəfindən azad edilməsi Türk dünyası tarixinə qızıl hərflərlə yazılıb:

“Mən xoşbəxtəm ki, qardaş Azərbaycanın 30 il erməni işğalı altında olan torpaqlarının azad edildiyi tarixi yaşamışam. Bu 44 günlük savaşın həyəcanını günbəgün, anbaan biz də yaşadıq. Son anadək qardaş Azərbaycanın yanında olduq və bununla qürur duyuruq. Ermənistanın 30 il Azərbaycan torpaqlarını işğalda saxlaması Türklüyə, İslama hücum idi. Şuşa azad ediləndə, Qarabağ torpaqları azad ediləndə bu, təkcə Azərbaycanın və Türkiyənin deyil, bütün Türk dünyasının qələbəsi idi. Şükürlər olsun ki, qardaş Azərbaycan bu qələbəni qazandı və bu gün biz bu qələbənin ikinci ildönümünü şərəf və qürur hissləri ilə qeyd edirik”.

Fahrettin Altun qeyd edib ki, son 30 ildə bütün beynəlxalq platformalarda Azərbaycan və Türkiyə münaqişənin sülh yolu ilə həllinə çalışırdı, ancaq işğalçı Ermənistan özü müharibə yolunu seçdi:

“Nəticədə qardaş Azərbaycan 30 ildə beynəlxaıq təşkilatların həll etmək istəmədiyi problemi özü 44 gün ərzində sona çatdırdı. Heç bir dövlət, beynəlxalq təşkilat Azərbaycan və Türkiyə liderlərinin qətiyyəti və iradəsinə əngəl ola bilmədi. Bu gün möhtərəm Prezidentlərimizin rəhbərliyi ilə Türk milləti əmin-amanlığa qovuşur”.

Tuzla Bələdiyyəsinin sədri Sadi Yazıcı qeyd edib ki, Qarabağ bizim əbədi vətənimizdir:

“Bu gün Tuzlada Azərbaycanın tarixi Zəfər Günü qeyd olunur. Artıq Ulu öndər Heydər Əliyevin “Bir millət, iki dövlət” ifadəsi ilə yanaşı, “Bir millət, bir qələbə” ifadəsini də səsləndirə bilərik. Çünki qardaş Azərbaycanın qələbəsi, Türkiyənin qələbəsidir. Qələbənin əldə olunmasında ən çox təşəkkür qəhrəman əsgərlərimizə düşür. Bir də o əsgərlərimizi səmada qoruyan İHA, SİHA və TİHA-larımız var olsun. Qələbəmiz əbədi və davamlı olsun. Necə deyərlər, bir kərə yüksələn bayraq, bir daha enməz. Biz əmin idik ki, Qarabağ bizim əbədi vətənimizdir. Biz Qarabağın azadlığını səbirsizliklə gözləyirdik. Allaha şükürlər olsun ki, həsrətimiz sona çatdı və indi bu qələbəni birlikdə qeyd edirik. Qarabağ Azərbaycandır, Azərbaycan Türkiyə, Türkiyə Azərbaycandır. Əminik ki, Tuzla Şuşadır, Şuşa isə Tuzladır. Var olsun qardaş Azərbaycan!”.

Azərbaycanın Ali Baş Komandanı İlham Əliyevin siyasi bacarığı, Azərbaycan Ordusunun gücü nəticəsində əldə edilən Qələbəni bütün türk dünyasının Zəfəri adlandıran çıxışçılar Azərbaycanın əzəli torpaqlarının geri qaytarılmasında Türkiyənin dəstəyini xüsusi vurğulayıblar.

Bildirilib ki, Azərbaycanın tarixi ədaləti bərpa edərək əldə etdiyi şanlı Zəfər bütün türk dünyasının qürur qaynağına çevrilib.

Tədbirdə Türkiyənin, eləcə də ölkəmizin Türkiyədə fəaliyyət göstərən dövlət qurumlarının əməkdaşları, ictimaiyyət və KİV nümayəndələri iştirak ediblər.

Mərasim əsnasında Azərbaycanın şanlı Qarabağ Zəfərinə gedən yolu, Azərbaycan və Türkiyə qardaşlığını özündə əks etdirən “Bir millət, Bir Zəfər” adlı fotosərgi açılıb.

Tədbir “Zəfər” konsert proqramı ilə davam etdirilib.

Konsertdə Azərbaycan və Türkiyə musiqiləri, eləcə də rəqslərindən nümunələr ifa olunub.