İsraildə media turunda iştirak edən azərbaycanlı jurnalistlər ölkənin şimalında, Yuxarı Qalileya dağlarında yerləşən Hurfeiş druz şəhərinə səfər ediblər.

APA-nın İsrailə ezam olunmuş müxbiri xəbər verir ki, səfər çərçivəsində jurnalistlər İsraildə Druz icmasının nümayəndəsi, Universal Sülh Şurası İnsan Hüquqları Təşkilatının sədri Şeyx doktor Kasem Bader ilə görüşüblər.

Görüş zamanı Bader İsraildə və regionun digər ölkələrində yaşayan druz icmalarının vəziyyəti, onların qarşılaşdığı çətinliklər və icmalar arasında əlaqələr barədə məlumat verib.

O bildirib ki, druzlar Suriya, Livan, İsrail və İordaniyada yaşayırlar və uzun illər ərzində bu ölkələr arasındakı siyasi vəziyyət və sərhəd məhdudiyyətləri səbəbindən ailə üzvləri və qohumları ilə görüşmək imkanından məhrum olublar.

Şeyx Kasem Baderin sözlərinə görə, Suriya və Livanla sərhədlərin bağlı olması druz icmaları arasında əlaqələrin qurulmasına ciddi maneə yaradır. O qeyd edib ki, İordaniya ilə sülh sazişindən sonra müəyyən imkanlar yaranıb, lakin Suriya və Livandakı vəziyyət druzların bir-biri ilə əlaqələrinə hələ də təsir edir.

Bader həmçinin druzların Yaxın Şərqdə azlıq icması kimi üzləşdiyi problemlərdən danışaraq, regionda sülh və sabitliyin təmin olunmasının icmaların gələcəyi baxımından mühüm olduğunu vurğulayıb.

Görüş zamanı jurnalistlər druzların tarixi, mədəniyyəti, dini ənənələri və İsrail cəmiyyətindəki rolu barədə də məlumat əldə ediblər.

Qeyd edək ki, druzlar Yaxın Şərqdə əsasən İsrail, Suriya, Livan və İordaniyada yaşayan, özünəməxsus dini və mədəni ənənələrə malik ərəb dilli icmadır. Druzlar özlərini ayrıca dini icma hesab edir və dini inanclarını qapalı icma daxilində qoruyurlar. İsraildə druzlar ölkənin sosial və ictimai həyatında fəal iştirak edir, o cümlədən İsrail Müdafiə Qüvvələrində xidmət edirlər.