Çətin hazırlıq və sınaq dövründən sonra ATL Tech ailəsi öz Süni İntellekt (AI) Laboratoriyasını təqdim etdi!

"Chatbot"un onlayn müştərilər ilə qüsursuz ünsiyyəti, elektron ticarət saytları tərəfindən müştərilərə tövsiyə olunan məhsullar siyahısı, taksi şirkətləri tərəfindən ən optimal tarif dərəcəsinin və çatma müddətinin hesablanması, Google və ya Alexa-nın nitq tanıma funksiyaları və bu kimi digər uğurlu nəticələr AI-in həyatımıza nə qədər dərin nüfuz etdiyini göstərir.

Süni İntellekt heç də bir çoxumuzun düşündüyü kimi insanlığı məhv edib dünyanı ələ keçirmək istəyən qəddar bir robot deyil. AI əslində, sadə dildə desək, IT mütəxəssislər tərəfindən hazırlanmış insan müdaxiləsini minimallaşdırmaqla tapşırıqların avtomatlaşdırılmasını təmin edən süni zəka maşınıdır. 

Bəli, AI günümüzün ən aktual mövzularından biridir. Ancaq, "ATL Tec" kimi yerli texnologiya şirkətinin bu sahəyə ciddi investisiya etməsi çox sevindirici hal olmaqla yanaşı, həmçinin ölkəmizdə bu sahənin gələcəyinə ümidlə baxmağımıza zəmin yaradır.

İnformasiya Texnologiyaları sahəsində 10 ildən artıq uğurlu təcrübəsi olan "ATL Tech" öz süni intellekt laboratoriyasını yaradan və bu sahənin istedadlı mütəxəssisləri ilə birgə çalışan ilk Azərbaycan şirkətlərindən biridir. 

"ATL Tech"in nəzdində yaradılmış süni intellekt mərkəzinin əsas diqqəti Azərbaycan dilində müxtəlif dialektlər daxil olmaqla nitqin tanınması və mətnə çevrilməsinə yönəlin. Hazırda ATL Tech-in proqram təminatçıları yuxarıda qeyd edilən "nitqdən mətnə" funksiyasını şirkətin ən qabaqcıl məhsullardan biri olan K3 – fövqəladə halları idarəetmə proqramına uyğunlaşdırmaq üzərində işləyirlər. Məqsəd proqram vasitəsilə zəng edən şəxsin danışığından baş verən hadisənin növü və ünvanı kimi lazımi məlumatların çıxarılması və avtomatik olaraq anketə yazılmasını insan müdaxiləsi olmadan təmin etməkdir. Bu funksiya çağrı mərkəzi operatorlarına lazımi tədbirləri daha tez və səhvsiz görməyə imkan verəcək ki, nəticədə ümumi risk əhəmiyyətli dərəcədə azalmış olacaq.

Mütəxəssislərin də qeyd etdiyi kimi, Azərbaycan dilində "nitqdən mətnə” köçürmə funksiyası hələ də problemli məsələlərdən biri olaraq qalmaqdadır. Bunu həll etmək üçün fərqli dialektlərdə, tonlarda və vəziyyətlərdə milyonlarca fərqli səs haqqında məlumat bazasının toplanması və yaradılması tələb olunur. Buna baxmayaraq, gözlənilən uğurun böyüklüyü yerli mütəxəssislərimizi çox həvəsləndirir.

Sevindirici haldır ki, süni intellekt mərkəzinin yeni elmi nəticələri ötən ay London Metropolitan Universitetində keçirilən beynəlxalq konfransda da müzakirə edilib. 

ATL Tech-in “AI Lab” layihəsi üzrə elmi məsləhətçisi Dr. Samir Rüstəmov bu tipli layihələrin ölkəmizdə süni intellekt sahəsinin inkişafı üçün əhəmiyyətindən danışıb:

"ATL Tech şirkətinin təqdim etdiyi məhsullara süni intellekt yönümlü funksiyalar daxil etmə strategiyası təqdirə layiqdir. Belə funksiyalara malik məhsullar daxili və xarici bazarda yüksək rəqabət potensialına malikdir. Bunu da qeyd etmək istərdim ki, laboratoriyada süni intellekt yönümlü məhsullarların yaradılması ilə yanaşı, nəzəri və təcrübi elmi tədqiqat işləri də aparılmaqdadır. Bu isə öz növbəsində yerli kadrların formalaşmasına zəmin yaradır".

Hazırda AI Laboratoriyasında iki tədqiqatçı və bir professor çalışır. Lakin ATL Tech komandasını böyütmək məqsədi ilə bu sahədə işləmək istəyən mühəndis və tədqiqatçıları komandaya qoşulmağa dəvət edir. Maraqlanan namizədlər CV-lərini mövzu olaraq "AI" qeyd etməklə atllab@atl.az elektron poçtuna göndərə bilərlər.

https://www.facebook.com/atltech.az/

 Ələkbər Vəlizadə, ATL AI Lab-ın rəhbəri                       

ATL Tech, baş ofisindən ümumi görüntü