Rusiya prezidenti Vladimir Putin Şərq İqtisadi Forumu (EEF) çərçivəsində Çin Xalq Respublikasının sədr müavini Han Jenqlə görüşüb.

Putin Çin sədri Si Cinpinin oktyabrda Kazanda keçiriləcək BRICS sammitində iştirak edəcəyini və onunla ikitərəfli görüş keçirəcəyini gözləyir.

Onun sözlərinə görə, ölkələrin birgə səyləri sayəsində “Çin və Rusiya arasında münasibətlər görünməmiş yüksək səviyyəyə çatıb”.

"Ümid edirəm ki, Şərq İqtisadi Forumunda bugünkü görüşlər və sabahkı birgə iş zamanı biz qarşılıqlı fəaliyyətimizin yeni sahələrini axtarıb tapa biləcəyik", - Vladimir Putin söyləyib.

EEF 3-6 sentyabrda keçirilir. Bu gün, sentyabrın 4-də Rusiya prezidentinin Serbiyanın baş nazirinin müavini Aleksandr Vulin və Malayziyanın baş naziri Ənvər İbrahimlə də görüşü nəzərdə tutulub.

May ayında Putin Çinə iki günlük səfər etmiş və Si Cinpin ilə görüşmüşdü. Avqustda Rusiya prezidenti Kremldə Çin Xalq Respublikası Dövlət Şurasının sədri Li Çianqı qəbul edib.