Bakı şəhərində mənzillərin qiyməti 2 dəfəyə qədər bahalaşacaq...

"Hazırda paytaxtın mərkəzindəki evlərin bir kavdratmetri 2000-3000 manat arasında dəyişir".

Bunu tikinti eksperti Elnur Fərzəliyev Redaktor.az-a hazırda mənzil bazarında evlərin satış qiymətlərindən danışarkən deyib.

Onun sözlərinə görə, qiymətlərin baha olması binada sakinlərə göstərilən xidmətlərlə bağlıdır:

"Bu tip binalarda mənzil qiyməti standart binalardakı evlərdən xeyli baha olur. Hazırda şəhərin mərkəzində bir kvadratmetri 5000 manata qədər olan mənzillər var. Xüsusən, bu mənzillər şəhərin Səbail, Nəsimi rayonunda yerləşir. Nərimanov rayonunda da bahalı mənzillər var. Burada bir kvadratmetri 900 manatdan 3500 manata qədər olan yeni tikili mənzillər var”.

Onun sözlərinə görə, ucuz mənzillər Yeni Yasamal, Həzi Aslanov, Günəşli, Xırdalan, Masazır ərazilərindədir:

"Bu ərazilərdə kvadratmetri 700-800 manata hazır binalarda təmirsiz mənzil almaq olar. Qiymətlərin dəyişməsi binaların proyektinə görə dəyişir. Köhnə binalarda məsələn Elmlər Akademiyası, Nərimanov ərazisində “Xruşovka” proyektində olan birotaqlı  mənzilin qiyməti 55-60 min manat arasındadırsa, “Stalin” layihəli bir otaqlı mənzilin qiyməti ortalama 80-100 min manat arası dəyişir. İkiotaqlı mənzil “Xruşşovka” tipli layihədə 80 min manatdırsa, 120-130 min manata  “Stalin”proyektindədir".

Ekspert qeyd edib ki, ilin sonuna qədər mənzillərin qiyməti düşməyəcək:

"Dövlət Şəhərsalma və Arxitektura Komitəsi tikinti şirkətlərinə şərt qoyub ki, binalar normativlərə uyğun tikilsin. Bu normativlər də tikinti şirkətlərinə sərf etmədiyinə görə, tikinti şirkətləri 60-70 faiz işlərini dayandırıblar. Köhnədən sərəncam alan tikinti şirkətləri  binaları tikə bilərlər. Amma yeni başlayan tikinti şirkətləri bu şərtlərlə evləri tiksələr, Bakı şəhərində mənzillərin qiyməti 2 dəfəyə qədər bahalaşacaq. Amma hazıra evlərin qiyməti əvvəlki illərlə müqayisədə stabil olaraq qalır. İpoteka kreditləri verilsə, pilot layihəyə düşən köhnə tikili binalarda evlərin qiyməti artacaq. Məsələn, Gənclik ərazisində  beşmərtəbəli binada ikiotaqlı mənzilin qiyməti 80 min manatdır. O ev pilot layihəyə düşərsə, sakinə yeni binada mənzil verildiyi təqdirdə, həmin  mənzilin qiyməti 120-130 min manat olacaq. Söküntülər başlasa, köhnə binalardakı evlərin də qiymətləri artacaq”.