Vəkillikdən uzaqlaşdırılan xanım vəkil öz hüquqlarının müdafiəsi üçün məhkəmələrə üz tutub. O, haqsız olaraq vəkillikdən uzaqlaşdırıldığını bildirir.

Musavat.com xəbər verir ki, Vəkillər Kollegiyasının rəhbərliyi İradə Cavadovanı vəkillikdən uzaqlaşdırıb. Səbəb isə vətəndaş Könül Mürsəlovanın şikayəti olub.

Belə ki, Könül Mürsəlova kollegiyaya məktub yazaraq iddia edib ki, İ.Cavadova ilə müqavilə bağlamayıb, ona etibarbamə verməyib, amma Cavadova onun vəkili kimi çıxış edib. Mürsəlova söyləyir ki, xanım vəkil onun adından Baş Mütəşəkkil Cinayətkarlıqla Mübarizə İdarəsində qanunsuz saxlanması, təzyiqə məruz qalması barədə daxili işlər nazirinə şikayət məktubu yazıb. Həmin məktub mətbuatda da yayılıb, bununla da şərəf və ləyaqətinə xələl gəlib.

Amma vəkil bunun tam əksini deyir və sübutlar da təqdim edir. İ.Cavadova bildirir ki, Könül Mürsəlova rəfiqəsilə birlikdə onun yanına gəlib və təzyiqlə üzləşdiyini, həbs təhlükəsinin olduğunu söyləyib: "Hüquqlarının müdafiəsi üçün onunla müqavilə bağladım. Bundan sonra Mürsəlova idarəyə çağrılıb, iki gün orada saxlanıldı, bu müddətdə vəkili və yaxınları ilə görüşünə icazə verilmədi. Bu üzdən Mürsəlovanın müdafiə hüququnun təmin olunması, vəkili ilə görüşünə imkan verilməsi üçün daxili işlər nazirinə müraciət etdim. Məsələ ictimailəşəndən sonra Mürsəlovanı buraxıblar. Şərt qoyublar ki, vəkildən şikayət etsin. O da bu şərti yerinə yetirib".

Bundan sonra da məhkəmə çəkişmələri başlayıb. Əvvəlcə Vəkillər Kollegiyası İradə Cavadovanı vəkillikdən uzaqlaşdırmaq üçün məhkəməyə verib. Sonra da Cavadova K.Mürsəlovanı məhkəməyə verib. Və tələbi də belə olub ki, K.Mürsəlovanın onun haqqında yazdıqları həqiqətə uyğun olmayan, işguzar nüfuzunu ləkələyən məlumat kimi qiymətləndirilsin. Bu əməlinə görə K.Mürsəlova vurduğu mənəvi zərərin əvəzi kimi 1000 manat kompensasiya ödəsin.

Bu işlə bağlı qərar Xəzər Rayon Məhkəməsində xanım vəkilin xeyrinə olub. Məhkəmə bu iddianı qismən təmin edib, K.Mürsəlovanın vəkil haqqında Vəkillər Kollegiyasına ünvanladığı teleqramda yazılanlar həqiqətə uyğun olmayan məlumat hesab edilib.

Amma sonradan bu qərar da ləğv edilib. Belə ki, İ.Cavadova da bu məhkəmə qətnaməsini alıb, Vəkillər Kollegiyasına təqdim edərək, vəkillikdən uzaqlaşdırılması qərarına yenidən baxılmasını istəyib.

İyunun 25-də Bakı Apellyasiya Məhkəməsində Məmməd Məmmədovun sədrlik etdiyi hakimlər kollegiyası İ.Cavadovanın əleyhinə qərar verib, Xəzər Rayon Məhkəməsinin qətnaməsi ləğv edilib. Amma İ.Cavadova məhkəmədə ondan şikayət yazan K.Mürsəlova ilə müqavilənin surətini, anası ilə yazışmalarınə da təqdim edibmiş.

Qeyd edək ki, İ.Cavadova vəkillikdən uzaqlaşdırılmasının səbəbinin başqa məsələ olduğunu deyib. O, hesab edir ki, müstəqil və prinsipial mövqeyi ilə seçilib, vəkil Yalçın İmanov kollegiyadan uzaqlaşdırılarkən Rəyasət Heyətinin üzvü olaraq, onun müdafiəsinə qalxıb. Kollegiya rəhbərliyi də bundan narazı qalıb.

Vəkillər Kollegiyasından "Azadlıq radiosu"na verilən açıqlamada bu iddia rədd edilir. Vəkilin vətəndaşın şikayəti əsasında cəzalandırıldığı bildirilir.
Musavat.com