Ötən ilin dekabrında Milanda Elmar Məmmədyarov və Zöhrab Mnatsakanyan arasındakı görüşdən sonra Ermənistan və Azərbaycan XİN rəhbərlərinin bu ilin yanvarında görüşəcəyi ilə bağlı anons verilib. Belə bir görüş olacaqmı? Yanvarın 8-i olmasına baxmayaraq, detallı informasiyalar yoxdur. 

Oxu.Az məsələ ilə bağlı Azərbaycan Xarici İşlər Nazirliyinə müraciət edib. 

Azərbaycan XİN-in mətbuat katibi Leyla Abdullayeva məsələ ilə bağlı açıqlamasında bildirilib ki, hazırda XİN rəhbərlərinin yanvarda görüşü ilə bağlı heç bir informasiya yoxdur. O əlavə edib ki, belə bir görüşün keçirilməsinin mümkünlüyü barədə hələ dekabrda məlumat verilmişdi.

Öz növbəsində, Ermənistan XİN-in mətbuat katibi Anna Naqdalyan bu məsələyə münasibət bildirib:

“ATƏT-in Minsk qrupunun həmsədrləri Azərbaycan və Ermənistan xarici işlər nazirləri – Elmar Məmmədyarov və Zöhrab Mnatsakanyana bu ilin yanvarında görüşməyi təklif ediblər. Görüşlə bağlı razılıq əldə ediləndən sonra geniş məlumat veriləcək”.