Bir neçə gündür sosial şəbəkələrdə Tərtər Rayon İcra Hakimiyyəti başçısı ilə sakinlər arasında mübahisəli məqamlara dair paylaşımlar edilir. 

Paylaşımlarda iddia edilir ki, Tərtər Rayon İcra Hakimiyyətinin başçısı Müstəqim Məmmədov müharibə zamanı rayonda evləri dağılmış sakinlərə dövlət tərəfindən ödənilən kompensasiya məbləğinin bir hissəsini tələb edir. İddialara görə, dağıdılan evlərin bərpası məqsədilə dövlətin müəyyən etdiyi ödənişi almaq üçün vətəndaşlar məbləğin 25 faizini icra başçısına verməlidirlər.

Sözügedən məsələyə aydınlıq gətirilməsi üçün Tərtər Rayon İcra Hakimiyyətinin başçısı Müstəqim Məmmədovla əlaqə saxladıq. İcra başçısı Oxu.Az-a açıqlamasında haqqında yayılan iddialara cavab verib.

O bildirib ki, evləri dağılmış sakinlərə kompensasiya məbləğini icra hakimiyyəti yox, Nazirlər Kabineti ödəyir:

“Ödənişlə bağlı bütün məlumatlar Nazirlər Kabineti tərəfindən “Kapital Bank”a göndərilir. Ödəniş “Kapital Bank”ın açdığı kart vasitəsilə vətəndaşa təqdim olunur. Yəni, bu prosesin icrasında İcra Hakimiyyətinin heç bir rolu yoxdur. Kimin bu məsələ ilə bağlı şikayəti varsa, prokurorluğa müraciət edə bilər. 

Bilirsiniz ki, Tərtərə müharibə zamanı çox mərmi düşüb. Bu səbəbdən də dağıntılar çoxdur. Qeyd edim ki, bu günə qədər 1483 vətəndaşa kompensasiya ödənilib. Fövqəladə Hallar Nazirliyi, Dövlət Arxitektura və Şəhərsalma Komitəsi bu məsələ ilə bağlı birgə çalışır. Komissiya məsələni işləyir, hazırlanan sənədləri aidiyyəti üzrə Nazirlər Kabinetinin müvafiq qurumlarına təqdim edir. Proses yekunlaşdıqda isə vətəndaşlara kompensasiya ödənişi həyata keçirilir”.