Son dövrlər Narkoloji Mərkəzə edilən müraciətlərdə polinarkomaniya, yəni iki və daha artıq sintetik, yarım sintetik və təbii narkotik vasitələrin birlikdə qəbulu halları çoxalıb.

Bu sözləri Səhiyyə Nazirliyi Respublika Narkoloji Mərkəzinin şöbə müdiri Pərvin Məmmədov mərkəzin fəaliyyəti barədə müsahibəsində deyib.

O bildirib ki, mərkəzə müraciət edənlərin psixoloji durumunun qorunmasına diqqət edilir:

“Narkoloji Mərkəzdə müalicə alan xəstələrə dərmanla yanaşı psixoloqlar tərəfindən fərdi və qrup terapiyaları şəklində psixoloji yardım göstərilir. Mövcud durumu nəzərə alaraq xəstələrə psixoloji yardımın intensivliyi artırılıb.

Son dövrlər edilən müraciətlərə əsasən deyə bilərik ki, polinarkomaniya halları çoxalıb. Psixostimulyatorlar qrupundan olan sintetik psixoaktiv maddə “metamfetamin” və opiatların birlikdə qəbulu istifadəçilərin sinir sistemində kəskin pozuntular yaradır. Belə hallarda həkim-narkoloqlarla yanaşı müalicədə həkim-psixoterapevt və həkim-nevropatoloqlara ciddi ehtiyac duyulur”.