2020-ci ildə ölkədə qeydə alınan 26 mindən çox cinayət hadisəsinin 5 252-sini (20,2 %-i) narkotik vasitələrin və psixotrop maddələrin qanunsuz dövriyyəsi təşkil edib.

Bu barədə Dövlət Statistika Komitəsinin yaydığı məlumatda qeyd olunub.

Daxili İşlər Nazirliyinin məlumatları əsasında hazırlanan statistikaya görə, 2020-ci ildə qeydə alınan göstəricilər 2019-cu il ilə müqayisədə 19,8 % çox olub.

2020-ci ildə qeydə alınan faktların 55,9 faizini satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşıma, 36,1 faizini eyni hərəkətləri satış məqsədilə etmə, habelə bu maddələri istehsal etmə, göndərmə, yaxud qanunsuz olaraq satma, 6,2 faizini qanunsuz olaraq tərkibində narkotik maddələr olan bitkiləri kultivasiya etmə, 1,7 faizini güclü təsir edən və ya zəhərli maddələrin satış məqsədilə qanunsuz dövriyyəsi, 0,1 faizini isə digər cinayətlər təşkil edib.

2020-ci ildə 3758,4 kiloqram narkotik vasitə və psixotrop maddə müsadirə edilib. Bu da 2019-cu ilin göstəricisindən 13,3 faiz çoxdur. Qanunsuz dövriyyədən çıxarılmış narkotik vasitələrin və psixotrop maddələrin 2341,1 kiloqramını heroin, 904,5 kq-nı marixuana, 277,9 kq-nı tiryək, 65,4 kq-nı həşiş, həşiş yağı və qətranı, 1,3 kq-nı kokain, 168,2 kq-nı isə digər narkotik və güclü təsiredici vasitələr təşkil edib.