Respublikanın əməkdar jurnalisti, tanınmış şair-publisist Tahir Talıblı 72 yaşını qeyd edir.

O, 1948-ci ilin fevral ayının 22-də Qərbi Azərbaycanın Loru-Pəmbək mahalı, Evli kəndində dünyaya gəlib.

Doğulduğu kənddə orta məktəbi bitirdikdən sonra təhsilini 1968–1972-ci illərdə Azərbaycan Dövlət Pedaqoji Universitetinin filologiya fakültəsində davam etdirib.

Hələ tələbə ikən - 1970-ci ildən imzasını "Azərbaycan gəncləri" qəzetinin vasitəsiylə oxuculara təqdim edib.

1974-cü ildə ali təhsilini başa vurduqdan sonra doğulduğu kənddə, orta məktəbdə Azərbaycan dili və ədəbiyyatı müəllimi kimi əmək fəaliyyətinə başlayan Tahir Talıblı 1975-1980-ci illərdə həmin məktəbin direktor müavini, 1980-1988-ci illərdə isə məktəbin direktoru vəzifəsində çalışıb.

1988-ci ildə on minlərlə soydaşımız kimi doğma yurd yerini tərk etməyə məcbur qalaraq, Bakı şəhərində məskunlaşıb.

1992-1993 -cü illərdə "Yeni fikir" qəzetinin əməkdaşı, sonra həmin qəzetin baş redaktoru vəzifəsində çalışmış, 1993-cü ildən Azərbaycan Dövlət Televiziya və Radio Verilişləri Şirkətində Radio verilişləri redaksiyasının Güney Azərbaycan şöbəsində redaktor, 1995-ci ildən 2020-ci ilin yanvar ayına qədər Azərbaycan radiosunun "Xalq yaradıcılığı" redaksiyasının baş redaktoru vəzifəsində çalışıb.

Azərbaycan radiosunda müxtəlif tədqiqat xarakterli verilişlərin ssenari müəllifi olub. O cümlədən, 25 il 1969-cü ilin noyabrında xalq yazıçısı Mövlud Süleymanlı tərəfindən yaradılıb araya-ərsəyə gələn "Bulaq" verilişin ssenarisini yazıb, "Divani saz-söz məclisi", "Dastan saatı", "Ozanların dilindən" kimi bir çox verilişlərinsə ssenari müəllifi və aparıcısı olaraq fəaliyyət göstərib.

Tahir Talıblının rəhbərlik etdiyi "Xalq yaradıcılığı" redaksiyasından dünyaya səpələnmiş türk xalqlarının, türk soylarının folklor nümunələri, üzü Şumerdən bəri gələn Şu, Bilqamış, Dədə Qorqud, Koroğlu, alpamış Koblantı Batır, Ural-Batır, Altun Arıq, Manas kimi dastanları, xalq yaradıcılığının müxtəlif sahələrində soy-kökümüzlə bağlı araşdırmaları, etnoqrafiya, toponimlər, tarixi adlar və s. Azərbaycan radiosunun dinləyicilərinə təqdim edilib.

Tahir Talıblı "Sevgi harayı","Yazılmamış şeirlər", "Yollara çıxmışam", "Bizi yurd saxlar", "Bu tale dediyin", "Qurdu qəmgin, quşu qərib"; "Əziz Əliyev:dövrü, həyatı, şəxsiyyəti" və "Vaxt vaxtında gəlir..." adlı 6- sı şeirlər, 2- si publisist əsər olmaqla 8 kitabın müəllifidir.

O, həmçinin "At igidin qardaşıdır", "O qüzeylər" və yeddi hissəli "Deportasiya" bədii filmlərinin də ssenari müəllifidir.

Azərbaycan Respublikası Prezidentinin Sərəncamı ilə 10 noyabr 2011-ci il tarxində "Əməkdar jurnalist" fəxri adi ilə təltif olunan tanınmış jurnalist, şair-publisist Tahir Talıblını redaksiyamız adından təbrik edir, ona uzun ömür, can sağlığı arzulayırıq.

Analoq.az